Hindistonning Chennay shahrida bo‘lib o‘tayotgan Butunjahon shaxmat olimpiadasida 10-tur o‘yinlari yakunlandi. O‘zbekiston erkaklar terma jamoasi Hindistonning ikkinchi jamoasiga qarshi o‘ta qiyin o‘yinlarni o‘tkazdi.

Dastlab Nodirbek Yoqubboyev va Jahongir Vohidov raqiblari bilan durang o‘ynashdi. Javohir Sindarov esa imkoniyatni boy berib qo‘ydi.

Nodirbek Abdusattorov esa kuchli shaxmatchi Gukesh bilan o‘yinda juda qiynaldi. Hind sportchisi debyutni va o‘yinning o‘rta qismlarini juda yaxshi o‘tkazdi va g‘alabaga yaqin edi. Ammo Abdusattorov nafaqat qiyin vaziyatdan chiqib ketdi, balki o‘yin so‘ngida g‘alabani ilib ketdi. Gukesh vaqt tanqisligiga duch kelgani uchun xatoga yo‘l qo‘ydi. Nodirbek bundan unumli foydalanib, g‘alabaga erishdi.

Natijada O‘zbekiston o‘ta qiyin raqib bilan durang o‘ynadi va 17 ochko bilan peshqadamlikni saqlab qoldi. Armaniston esa Ozarboyjonni mag‘lub etib, 17 ochko bilan 2-o‘ringa ko‘tarilib oldi.

O‘zbekiston ayollar terma jamoasi Paragvayga qarshi bahsda 3:1 hisobida g‘alabaga erishdi.

Ertaga so‘nggi tur o‘yinlari o‘tkaziladi. Raqiblarimiz birozdan keyin aniq bo‘ladi.