Ronaldu futbol olamida o‘z ta’siriga ega nomlardan biridir. U futbolchilik faoliyati bilan bir paytda biznesni ham birdek yuritishga o‘rgangan. Hujumchi yillar davomida futbol orqali ishlab topgan pullarini unumli joylarga sarflab kelmoqda. Ronaldu 2022 yil boshida o‘zining beshinchi mehmonxonasini ochdi. U allaqachon Lissabon, Madrid, Nyu-York hamda o‘z ona yurti Madeyrada mehmonxonalarga ega. Beshinchi mehmonxona uchun esa o‘ziga xos manzil tanlandi...

Portugaliya terma jamoasi a’zosi Marokashning Marokash shahrida yangi otelni ishga tushirdi. Bu esa e’tiborga molik voqelikdir. Shuncha qulay va mashhur shaharlar turib, aynan Afrika shahri tanlanishi, hammani hayratda qoldirgan edi. Marokash shahridagi mehmonxona «Pestana CR7 Lifestye» deb nomlanadi. U Pestana mehmonxonalar tarmog‘i yordamida yaratilgan. Ronaldu ushbu ishi bilan Jahon mehmonxonalari tanlovida oliy o‘ringa loyiq ko‘rilgan edi. Lyuks versiyasidagi inshoat 174 ta xona, SPA, biznes markaz, basseyn hamda trenajor zalidan tashkil topgan. Xonalarning har biri kategoriyasiga qarab kuniga 158 funtdan 372 funtga qadar narxlanadi. Mehmonxona tomidagi panoramali muhit Atlas tog‘larini esga soladi. U yerdagi mehmonlarga esa sog‘lom ichimlik va ovqatlar taqdim qilinadi.

Krishtianu Ronaldu mehmonxonalari haqida shunday degan edi: «Ilk bor 2016 yilda Pestana Group hamkorligida mehmonxona ochganimda, bizning maqsadimiz xalqaro brend yaratish bo‘lgan. Shundan buyon, Madeyra, Lissabon va hattoki Nyu-York shahrida ham o‘z so‘zimizga ega bo‘ldik. Marokash shahridagi ishimiz esa beshinchisi bo‘ldi va xalqaro darajada muvaffaqiyatga erishdik. Bu mehmonxonalar faqatgina songa e’tibor qaratmagan. Ular meni va Portugaliyani ifoda etadi. Shu sabab unda ishlovchilarga katta talablar qo‘yiladi».

Shuningdek, Ronalduning bu boradagi hamkori bo‘lgan «Pestana Group» prezidenti Dionisyo Pestana o‘z fikrlari bilan o‘rtoqlashdi: «Pestana hamda Ronaldu hamkorligi Afrikadagi mehmonxona orqali yangi davrga kirdi.

Biz shu sohada 20 yildan beri xizmat ko‘rsatib kelmoqdamiz. Orzularimiz ro‘yobga chiqdi. Biz mehmonxona ochish orqali o‘zimiz uchun yangi tajribaga ham ega bo‘ldik. Afrikaning eng mashhur shaharlaridan birida o‘z brendimizga ega ekanimizdan xursandmiz».

ISMATOV J.