1956 yildan beri deyarli har yili o‘tkazib kelinadigan individual sovrin bo‘lmish «Oltin to‘p» - taqdirlash marosimi, o‘zining ibtidosidan beri jahonning eng obro‘li voqeliklaridan biriga aylandi. U «France Football» jurnali muharriri Gabriel Anoning o‘z hamkasblariga kiritgan Yevropadagi eng yaxshi futbolchiga ovoz berish taklifi bilan dunyoga keldi. Keyinchalik, yillar o‘tishi bilan ushbu sovrin uchun butun dunyo futbolchilari kurashadigan bo‘ldi. Qolaversa, bir nechta rebrending ishlari o‘tkazildi. Shunga qaramay, sovrin topshirishning asosiy qoidalari o‘zgarmay kelmoqda. Hozirga qadar 25 ta futbolchi ushbu sovrinni qo‘lga kiritishga erishgan. Quyida «Oltin to‘p» haqida ayrim ma’lumotlar keltirib o‘tiladi.
Sovrin kim tomonidan eng ko‘p yutilgan?
Lionel Messi ushbu individual sovrinni rekord darajada, yetti bor yutishga muvaffaq bo‘lgan. Undan keyingi o‘rinda Ronaldu turadi (5 ta). Qolgan quyi pog‘onalarni Mishel Platini, Yoxan Kroyf, Marko van Basten ( 3 tadan), Frans Bekkenbauer, Ronaldo, Alfredo Di Stefano, Kevin Kigan hamda Karl-Xayns Rummenigge (2 tadan) band etgan.
Sovrinning eng yosh egasi kim edi?
«Oltin to‘p»ni eng yosh futbolchi sifatida qabul qilib olgan vakil bu braziliyalik Ronaldo bo‘ladi. U ilk bor 1997 yilda, 21 yoshida ushbu sovrinni boshi uzra baland ko‘targan. Ronaldo o‘z vaqtida eng qimmat futbolchiga aylangandi. U uchun «Inter» «Barselona»ga 20 million funt to‘lab bergan.
Sovrinni davlatlar kesimida yutib olish
Bu borada to‘rtta davlat vakillari bir xil, 7 martalik ko‘rsatkichga ega: Germaniya, Niderlandiya, Argentina hamda Portugaliya. Qolgan o‘rinlarda Fransiya (6 ta), Italiya, Braziliya hamda Angliya (5 martadan) turadi.
Sovrinni klublar kesimida yutish
Klublar miqyosida hech bir jamoa «Barselona»dan ko‘p «Oltin to‘p» egasini o‘z bag‘rida saqlamagan. Hozirga qadar Kataloniya yulduzlarining 6 tasi 12 bor «Oltin to‘p»ga ega chiqqan. Bu esa «Real Madrid»dan bittaga ko‘p deganidir (11 ta). Italiyada «Yuventus» hamda «Milan»ning o‘tmishdagi futbolchilari orasida 6 tasi jami 8 marta bu sovrinni olishga erishgan. Germaniya gegemoni bo‘lgan «Bavariya» ushbu ro‘yxatda 3 ta futbolchining jami 5 ta sovrini bilan keyingi o‘rinni band etgan. Shuningdek, «MYU»ning 4 ta futbolchisi 4 marta «Oltin to‘p»ni olgan edi.
ISMATOV J.
