"Paxtakor" klubi bosh murabbiyi Maksim Shaskix Superliga 15-turidan o‘rin olgan "Neftchi"ga qarshi (2:0) o‘yindan so‘ng matbuot anjumanida ishtirok etdi.

"O‘yin qiziqarli va keskin kechdi. Birinchi bo‘limdagi vaziyatlarning o‘zidan samarali foydalanganimizda bahs taqdirini hal etishimiz mumkin edi. Biroq ulardan foydalana olmadik. Ikkinchi bo‘limda "Neftchi" bizga muammo yaratishga urindi, lekin qizil kartochkadan so‘ng biz to‘liq ustunlikka ega bo‘ldik. Ikkinchi gol o‘yinni deyarli yakunladi. Keyin to‘pni xotirjam nazorat qilib, bahsni nihoyasiga yetkazdik.

Jamoaga yangi qo‘shilgan futbolchilardan ko‘nglim to‘lmoqda. Taktik uslubga har bir o‘yinchi ko‘nikib olgach, yanada yaxshiroq futbol ko‘rsatamiz.

Har bir raqib jiddiy qiyinchilik tug‘dirishi mumkin. "Neftchi" oxirgi o‘rinlarda bormoqda, lekin jiddiy muammo yaratadigan jamoa. Superligada barcha maydonlar yaxshi bo‘lishini istardim. Shunda o‘yinlar tezroq, keskinroq bo‘ladi. Ushbu maydon holati yomon emas, ammo uch jamoaning o‘yin o‘tkazayotgani sababli yuklamaga chiday olmasligi mumkin. Keyingi yil Farg‘onada o‘ynashdan xursand bo‘lamiz. Futbol ishqibozlar uchun o‘ynaladi", - dedi Shaskix.