"Tottenxem" hujumchisi Xarri Keyn APLda London derbisi to‘purarlari ro‘yxatida ikkinchi o‘rinni egallab turibdi. Hujumchi hisobida 42 ta gol bor.

Bu ko‘rsatkich bo‘yicha Keyn "Arsenal"ning sobiq hujumchisi Tyerri Anridan keyin ikkinchi o‘rinda bormoqda, uning hisobida 43 ta gol bor.

Bundan tashqari, Keyn bir jamoa safida Angliya Premyer-ligasida gol urish bo‘yicha "Manchester Siti"ning sobiq hujumchisi Serxio Agueroning rekordini takrorladi.

14 avgust kuni Keyn 2-tur doirasidagi "Chelsi"ga qarshi o‘yinda (2:2) jamoasini mag‘lubiyatdan qutqarib qoldi va 90+6-daqiqada hisobni tenglashtirdi. Bu to‘p uning Premyer-ligadagi 184-to‘pi bo‘ldi. Aguero "Manchester Siti" safida o‘ynab, aynan shunday natijani qayd etgan.