"Chelsi" bosh murabbiyi Tomas Tuxel "Tottenxem" klubiga qarshi bo‘lib o‘tgan o‘yindan so‘ng, bosh hakam Entoni Teylorni tanqid qildi.

Nemis mutaxassisining fikricha, "shporlar"ning ikkala goli ham hisoblanmasligi kerak edi. Tuxelning so‘zlariga ko‘ra, Antonio Konte jamoasining birinchi goli Kay Xaversga nisbatan qo‘pollikdan so‘ng kiritilgan, ikkinchi golga bir necha soniya qolganida esa hakam Kristian Romeroni maydondan chetlatmagan, chunki argentinalik futbolchi Mark Kukurelyaning sochidan tortib olgan. Eslatib o‘tamiz, uchrashuv 2:2 hisobida durang bilan yakunlangandi.

"Keyingi o‘yinda men zaxira o‘rindig‘ida bo‘lmayman, ammo hakam ishlashda davom etadi", - dedi Tuxel matbuot anjumanida.

Konte Tuxel bilan birga o‘zaro to‘qnashuv uchun final hushtagidan so‘ng qizil kartochka oldi. Har ikki murabbiy ham APLning navbatdagi turida o‘z jamoalarini boshqara olmaydi.