Tarkib bilan bog‘liq muammolar shu bilan tugamaydi.
Darvin Nunyes "Kristal Pelas"ga qarshi o‘yinda qizil kartochka olgani uchun Premyer-liganing navbatdagi uchta o‘yiniga diskvalifikasiya qilindi.
Diogu Jota ham mavsumoldi jarohatidan forig‘ bo‘lishi uchun yana kamida to‘rt haftani maydondan tashqarida o‘tkazib yuboradi. Roberto Firmino "Kristal Pelas"ga qarshi o‘yinni o‘tkazib yubordi, uning yo‘qligi ehtiyot choralari bilan izohlandi, ammo ayni damda uning kelasi haftada "Manchester Yunayted"ga qarshi o‘ynay olishiga katta shubhalar bor.
Ehtimol, Yurgen Klopp "Liverpul"dagi faoliyati davomida birinchi marta odatdagidek uch kishilik hujumni yig‘ish uchun yetarlicha hujumchiga ega emas.
Bunday vaziyatda Muhammad Saloh va Luis Diaz katta sahnaga chiqishi aniq, ammo baribir Kloppning pozisiyasi ancha murakkabligicha qolmoqda. Demak, keling, “MYU”ga qarshi o‘yin uchun mersisaydliklarning uchta taxminiy hujum chizig‘i variantini ko‘rib chiqamiz.
1-variant: Elliot o‘ng qanotda, Saloh markazda
"Kristal Pelas"ga qarshi o‘yinda biz Xarvi Elliotning o‘ng qanotda juda yaxshi harakat qilganini ko‘rdik. U bahsni o‘ng qanot yarim himoyachisi sifatida boshladi, lekin uchrashuv davomida o‘z pozisiyasidan ko‘ra yuqoriroqda ko‘proq harakat qildi.
Saloh asosan vinger pozisiyasida o‘zini qulay his qilsa-da, uning markaziy hujumchi sifatidagi statistikasi hayratlanarli - Transfermarkt ma’lumotlariga ko‘ra, u bu nuqtada 29 o‘yin o‘tkazib, 24 gol urgan va 11 golga assistentlik qilgan.
2-variant: Trent - aldamchi to‘qqizlik pozisiyasida
Nunyesning chetlatilishida eng hayratlanarlisi shundan keyin “Liverpul”ning qanday o‘ynagani bo‘ldi – Trent Aleksandr-Arnold deyarli yarim soat davomida aldamchi to‘qqizlik sifatida harakat qildi.
Trent faoliyatini davomida hech qachon bunday vazifani bajarmagan va "Pelas"ga qarshi o‘yinda u deyarli bu pozisiyada foydali harakatlar bilan ajralib turmadi. Uning ideal pozisiyasi hamon o‘ng qanot himoyasi yoki yarim himoyasi bo‘lib turibdi.
Biroq, uni markazda qo‘llash, albatta, "Liverpul"dagi ba’zi muammolarni hal qiladi, chunki yarim himoya ham jarohatlar bilan bog‘liq inqirozga duch kelmoqda. Bu, shuningdek, Elliotning oldinga siljishiga va Salohning markazga o‘tishiga imkon beradi.
Agar Klopp bu taktikani sinab ko‘rsa, bu albatta qiziqarli tajriba bo‘ladi.
3-variant: 4-4-2 sxemasi
"Liverpul" deyarli umuman 4-4-2'dan foydalanmaydi, Klopp qo‘l ostidagi jamoalar 99% uch hujumchi bilan o‘ynaydi. Biroq, hozir sharoit shundayki, murabbiy biroz boshqacha yo‘l tutishi kerak.
Elliott o‘ng qanot yarim himoyasida yaxshi o‘ynadi va uni o‘sha yerda qoldirish mantiqan to‘g‘ri. Chap qanotda Nabi Keyta maydonga tushishi mumkin.
Bu futbolchilarning pozisiyasi yuqoridagi kabi qat’iy qoidalarga ega bo‘lmaydi, chunki "Liverpul" o‘yinchilari o‘yin davomida ko‘pincha o‘z nuqtalarini almashtiradilar.
Albatta, Klopp bu vaziyatda qiziqarli va kutilmagan taktika qo‘llashi mumkin ekanligini ham unutmasligimiz kerak.
