Ertaga Qarshi shahrida ayollar futbol klublari o‘rtasida Osiyo chempionati doirasida G‘arb mintaqasidagi o‘yin bo‘lib o‘tadi. Unda O‘zbekiston chempioni — "So‘g‘diyona-W" klubi Eroning "Bam Xatun" klubiga qarshi maydonga chiqadi. To‘qnashuv 2ta o‘yindan iborat bo‘lib, dastlabki 20 avgust, ikkinchisi 23 avgust kuni o‘tkaziladi. Xar ikkala bahsga Qarshi shahridagi "Markaziy" stadion mezbonlik qiladi.

Bugun esa har ikki jamoa bosh murabbiylari ishtirokida matbuot anjumani o‘tkazildi. Dastlab «So‘g‘diyona-W» bosh murabbiyi Sherali Boboqulov va futbolchi Xolida Dadaboyeva o‘z fikrlari bilan o‘rtoqlashishdi:

“Avvalambor yurtimizda ayollar futboliga bee’tibor bo‘lmaganlarni mazkur musobaqa boshlanayotgani bilan tabriklayman. Jamoamiz uchun tarixiy turnir hisoblanadi. Bosqichma-bosqich amalga oshirgan mehnatlarimiz sabab shu darajaga keldik. Bu samara bermoqda. Ertaga bor kuchimizni ishga solib chiroyli o‘yin ko‘rsatishga harakat qilamiz”, — dedi Boboqulov.

“O‘zbekistonda ayollar futboliga berilayotgan e’tibor uchun rahmat aytib qolaman. Bunday musobaqalar biz uchun orzu bo‘lib kelgan. Nafaqat «So‘g‘diyona», balki O‘zbekiston sharafini himoya qilish biz uchun sharaf", — dedi Xolida Dadaboyeva.