Эртага Қарши шаҳрида аёллар футбол клублари ўртасида Осиё чемпионати доирасида Ғарб минтақасидаги ўйин бўлиб ўтади. Унда Ўзбекистон чемпиони — "Сўғдиёна-W" клуби Эронинг "Бам Хатун" клубига қарши майдонга чиқади. Тўқнашув 2та ўйиндан иборат бўлиб, дастлабки 20 август, иккинчиси 23 август куни ўтказилади. Хар иккала баҳсга Қарши шаҳридаги "Марказий" стадион мезбонлик қилади.

Бугун эса ҳар икки жамоа бош мураббийлари иштирокида матбуот анжумани ўтказилди. Дастлаб «Сўғдиёна-W» бош мураббийи Шерали Бобоқулов ва футболчи Холида Дадабоева ўз фикрлари билан ўртоқлашишди:

“Авваламбор юртимизда аёллар футболига беэътибор бўлмаганларни мазкур мусобақа бошланаётгани билан табриклайман. Жамоамиз учун тарихий турнир ҳисобланади. Босқичма-босқич амалга оширган меҳнатларимиз сабаб шу даражага келдик. Бу самара бермоқда. Эртага бор кучимизни ишга солиб чиройли ўйин кўрсатишга ҳаракат қиламиз”, — деди Бобоқулов.

“Ўзбекистонда аёллар футболига берилаётган эътибор учун раҳмат айтиб қоламан. Бундай мусобақалар биз учун орзу бўлиб келган. Нафақат «Сўғдиёна», балки Ўзбекистон шарафини ҳимоя қилиш биз учун шараф", — деди Холида Дадабоева.