“Andijon” – “Turon” o‘rtasidagi uchrashuvdan keyingi matbuot anjumanining ikkinchi qismida mezbonlar bosh murabbiyi Viktor Kumikov ishtirok etdi.

— Viktor Balyutovich, g‘alaba bilan tabriklaymiz. O‘yin qanday taassurot qoldirdi?

— Ikkinchi taymdan qoniqmadim, albatta. Eng asosiysi, g‘alaba qozondik. Nima uchunligini bilmaymanu, ammo ikkinchi taymdagi o‘yinimiz o‘xshamadi. Tanaffus vaqtida biz futbolchilar bilan gaplashib, yana birinchi taymdagi o‘yinni ko‘rsatish kerakligi bo‘yicha kelishib olgandik. Ikkinchi taymda 10 daqiqa vaziyatni ushlab turdik. Keyinchalik gol o‘tkazib yubordik. Vaziyatni ushlab turish uchun o‘yinchilarni almashtirdim. Ammo yana nimadir bo‘ldiyu, ikkinchi golni ham o‘tkazib yubordik. Muhimi, vazifani bajardik va g‘alaba qozondik.

— Doim bir xil savol berish jurnalist uchun qiyinroq. Ammo ikkinchi taymni so‘nggi daqiqalarida nima yuz berdi?

— Hisobni ushlashga harakat qildik. Men o‘yinchilarga albatta bunday demadim. Lekin o‘sha vaziyatlarda ularning ruhiyati shunga qaratilgandi. “Azart” o‘yin bo‘ldi. Shu orada futbolchilarni ham almashtirdim. Shunday bo‘lsa-da, hisobni ushlab qoldik.

— Siz o‘yindan qoniqmadingiz, to‘g‘rimi?

— Birinchi taymdan qoniqdim. Ikkinchi taymdan esa yo‘q. Bu joriy mavsumdagi eng yaxshi birinchi taym bo‘ldi. Hujumlar qildik, yaxshi himoyalandik, standart vaziyatlardan foydalandik va gollar urdik. Ikkinchi taym esa ancha og‘ir bo‘ldi. 3:0 hisobida yutayotib 2 ta to‘p o‘tkazib yuborish ancha qiyinchilik tug‘dirdi. Bu haqiqiy ruhiyat bilan bog‘liq. Bu narsani to‘g‘rilashimiz kerak.

— Jamoaning Kubokdagi maqsadi qanday?

— Keyingi bosqichga chiqdik. Endi qur’ani kutamiz va shunga qarab tayyorgarlik ko‘ramiz.  

“Andijon” matbuot xizmati.