"Barselona" yangi o‘ng qanot himoyachisi qidirishda davom etmoqda. Xuan Foyt (Vilyarreal) va Toma Menye (Borussiya D)ga muqobil sifatida ispan klubi o‘z tarbiyalanuvchisi, Londonning "Arsenal" klubi futbolchisi Ektor Belyerinni qaytarish imkoniyatini ko‘rib chiqmoqda. Bu haqda Sport.es nashri xabar bermoqda.

Manbaga ko‘ra, 27 yoshli Belyerin Foytdan ko‘ra "ko‘k-anorranglilar" uchun moliyaviy jihatdan qulayroq futbolchi bo‘lib turibdi. Menyeni "Borussiya" qo‘yib yuborishga tayyor emas, o‘tgan mavsumni "Betis"da ijarada o‘tkazgan Belyerin esa "Arsenal"ni o‘zi tark etishni rejalashtirmoqda. Ektor “Betis”ga qaytishni xohladi, ammo Sevilya jamoasida moliyaviy muammolar bor.

Belyerin "Barselona" tarbiyalanuvchisi. U 2011 yilda ispan jamoasini tark etib, London klubiga yo‘l oldi.