Dortmundning «Borussiya» hujumchisi Karim Adeyemi «Barselona»ga o‘tishga yaqin turibdi.

Jurnalist Patrik Bergerning ma’lumotlariga ko‘ra, kataloniyaliklarning hujumchini sotib olish bo‘yicha qilgan ilk rasmiy taklifi taxminan 20 million yevroni tashkil etadi. «Asalarilar» o‘z futbolchisi uchun o‘zlari istagan 40 million yevroni olishlari qiyin bo‘ladi, chunki uning shartnomasi atigi bir yildan so‘ng yakuniga yetadi.

Shunga qaramay, «Borussiya» Adeyemi transferi uchun «Zalsburg»ga to‘lagan summani — taxminan 33 million yevroni qaytarib olmoqchi. Shuningdek, bitimga keyingi sotuvdan tushadigan foizlar va bonuslar ham kiritilishi kerak. Transfer ustida ish olib borilmoqda. Adeyemi allaqachon «Barselona» bilan uzoq muddatli shartnoma shartlari bo‘yicha kelishib olgan.