"Nasaf" bosh murabbiyi Ro‘ziqul Berdiyev O‘zbekiston kubogi nimchorak final bosqichi doirasida bo‘lib o‘tgan "Surxon"ga qarshi uchrashuvidan so‘ng o‘z fikrlarini bildirdi.

«Bugun o‘yinni ham, hisobni ham nazorat qildik. Birinchi goldan so‘ng yana ko‘plab vaziyatlar yaratdik, lekin ulardan foydalana olmadik. Vaziyatlardan foydalanmaganimiz uchun o‘z darvozamizdan to‘p olib chiqishga majbur bo‘ldik. Bu vaziyatda himoyachilarimiz xatoga yo‘l qo‘yishgandi. Qolgan vaziyatlarda himoyachilarimiz tartibli harakat qilishdi.

Ikkinchi bo‘limdagi ajoyib harakatlarimiz bugungi g‘alabamizning asosiy omili bo‘ldi. Hisobda oldinga chiqib olganimizdan keyin ham vaziyatlar yaratishga harakat qildik. Asosiysi biz keyingi bosqichga chiqdik. Bu bilan barcha muxlislarimizni tabriklaymiz.

Biz «Surxon» jamoasini yaxshi o‘rgangan edik. Jamoada xorijlik murabbiy faoliyat olib bormoqda. Biz raqib uzun uzatmalar bilan o‘ynashini bilardik. Shuning uchun biz uchta markaziy himoyachi bilan o‘ynadik. Bu bizga foyda keltirdi», — dedi Ro‘ziqul Berdiyev.