Saudiya Arabistonining "An-Nasr" klubi yarim himoyachisi Jaloliddin Masharpiov faoliyatini Misr chempionatida davom ettiradigan bo‘ldi. Qohira shahrining "Al-Ahli" klubi 28 yoshli futbolchining transferi borasida saudiyaliklar bilan kelishuvga erishishdi. Bu haqda saudiyalik jurnalist Abdulaziz az-Zamil xabar tarqatdi.

Shuningdek, ushbu xabarni "Al-Ahli" klubi vakillari ham tasdiqlashdi. Shartnoma imzolanganidan so‘ng bu haqda rasmiy xabar tarqatiladi. Masharipovning o‘zi ham faoliyatini Misrda davom ettirishga rozi bo‘lgan. Transfer summasi va futbolchining "Al-Ahli" bilan shaxsiy shartnomasi haqida ma’lumot berilmadi.

Jaloliddin 2021 yilning yanvar oyida 1 mln. yevro evaziga Saudiyaning "An-Nasr" klubiga o‘tgandi. Ammo klub o‘sha paytda o‘zbekistonlik futbolchini ro‘yxatdan o‘tkaza olmagani uchun uni BAAning "Shabab al-Ahli" klubiga ijaraga bergandi. Masharipov bu jamoa safida BAA liga kubogi va BAA prezidenti kubogi musobaqalarida g‘olib chiqdi.

Futbolchi Saudiya Arabistoni chempionatining 2021/2022 yilgi mavsumida 26ta o‘yinda ishtirok etib, 4 gol va 6 assist muallifiga aylandi. U "An-Nasr" bilan chempionatning bronza medalini qo‘lga kiritdi. Shuningdek, Masharipov ar-riyodliklar safida OCHL-2021da yarim finalgacha yetib bordi.

Qohiraning "Al-Ahli" klubi Misr chempionatining joriy mavsumida 31ta o‘yindan so‘ng 64 ochko bilan 3-o‘rinni egallab turibdi. Jamoa 2-o‘rindagi "Piramids" klubidan bitta o‘yin kam o‘tkazgan holda 4 ochko ortda qolmoqda. "Zamalek" esa 76 ochko bilan chempionlikni qo‘lga kiritib bo‘lgan. "Al-Ahli" ikkinchi o‘rinni qo‘lga kiritsa, Afrika chempionlar ligasi yo‘llanmasiga ega bo‘ladi.

Misrda joriy mavsum 31 avgust kuni yakuniga yetadi. Yangi mavsum esa oktyabr oylarida start oladi.