«Roma» klubi va O‘zbekiston terma jamoasi hujumchisi Eldor Shomurodov Turkiyaning «Beshiktosh» jamoasi qiziqishiga sabab bo‘lgan. Bu haqda «Sport-Ekspress» xabar qilmoqda.

Turk klubi rimliklar bilan muzokara o‘tkazgan. Bu haqda «Beshiktosh» sport direktori Jeyhun Kazanchi ma’lum qildi.

«Biz ‘Roma’ vakillari bilan iyun oyida uchrashdik. Biroq keyin boshqa hujumchi sotib oldik. Hozirda yana bir hujumchiga ehtiyojimiz yo‘q. ‘Beshiktosh’ futbolchi uchun sotib olish huquqi bilan bir yillik ijara shartnomasi taklif qilgandi», — deydi Kazanchi.

Avvalroq «Bolonya» Shomurodovni sotib olish huquqi bilan ijaraga olishi va ayrim ko‘rsatkichlar qayd etiladigan bo‘lsa, bu huquq majburiyatga aylanishi haqida xabar qilingandi. Shuningdek, Turkiyaning amaldagi chempioni «Trabzonspor» ham o‘zbekistonlik o‘yinchiga qiziqish bildirgani aytilgandi.

Shomurodov 2021 yilning yozgi transfer oynasida 18 million yevro evaziga «Jenoa»dan «Roma»ga o‘tgandi. U «bo‘rilar»safida jami 40 ta o‘yin o‘tkazib, beshta gol va oltita golli uzatma amalga oshirdi.