O‘zbekiston Superligasining 17-turidan o‘rin olgan navbatdagi bahsda «Neftchi» o‘z maydonida «Qizilqum»ni qabul qildi.

Uchrashuvning 42-daqiqasida Islom Kenjaboyev hisobni ochdi. Oradan bir necha daqiqa o‘tib, Abror Ismoilov muvozanatni tikladi. 56-daqiqada Ismoilov dubl qayd etdi va jamoasini hisobda oldinga olib chiqdi.

“Neftchi” klubi uzoq kutilgan g‘alabasini qo‘lga kiritdi. Yangi bosh murabbiy Vitaliy Levchenko boshchiligida farg‘onaliklar ikkinchi davradagi birinchi muvaffaqiyatiga erishishdi. Murabbiy ilk g‘alabasi haqida quyidagilarni aytib o‘tdi:

“Men kutganimdan ham qiyin o‘yin bo‘ldi. Birinchi bo‘limda penaltidan gol ura olmaganimiz hamda o‘tkazib yuborilgan gol futbolchilarimizni ruhiy tomondan “sindirishi” mumkin edi. Biroq bunday bo‘lmadi.

Lekin yigitlarimiz yana o‘yinga “qaytdilar” va tanaffusga qadar hisobni 1:1 ko‘rinishiga keltirishdi.

Ikkinchi bo‘limda kerakli ko‘rsatmalarni berdik va jamoamiz yanada kuchli bo‘lib qaytdi. Natijada raqibga bosim o‘tkazdik va shunga asosan ikkinchi golni urishga muvaffaq bo‘ldik. Muhimi, biz g‘alaba qozondik”, - dedi Levchenko.