Ўзбекистон Суперлигасининг 17-туридан ўрин олган навбатдаги баҳсда «Нефтчи» ўз майдонида «Қизилқум»ни қабул қилди.
Учрашувнинг 42-дақиқасида Ислом Кенжабоев ҳисобни очди. Орадан бир неча дақиқа ўтиб, Аброр Исмоилов мувозанатни тиклади. 56-дақиқада Исмоилов дубль қайд этди ва жамоасини ҳисобда олдинга олиб чиқди.
“Нефтчи” клуби узоқ кутилган ғалабасини қўлга киритди. Янги бош мураббий Виталий Левченко бошчилигида фарғоналиклар иккинчи даврадаги биринчи муваффақиятига эришишди. Мураббий илк ғалабаси ҳақида қуйидагиларни айтиб ўтди:
“Мен кутганимдан ҳам қийин ўйин бўлди. Биринчи бўлимда пенальтидан гол ура олмаганимиз ҳамда ўтказиб юборилган гол футболчиларимизни руҳий томондан “синдириши” мумкин эди. Бироқ бундай бўлмади.
Лекин йигитларимиз яна ўйинга “қайтдилар” ва танаффусга қадар ҳисобни 1:1 кўринишига келтиришди.
Иккинчи бўлимда керакли кўрсатмаларни бердик ва жамоамиз янада кучли бўлиб қайтди. Натижада рақибга босим ўтказдик ва шунга асосан иккинчи голни уришга муваффақ бўлдик. Муҳими, биз ғалаба қозондик”, - деди Левченко.
