Лондоннинг «Челси» клуби ҳимоячи Марк Кукурельянинг ўрнини ким билан тўлдириши мумкинлиги маълум бўлди. Аввалроқ, испаниялик футболчи Мадриднинг «Реал» клубига ўтишни якунлагани ҳақида хабар берилган эди.
Журналист Саймон Филлипснинг маълумотларига кўра, «Челси» «Спортинг» ҳимоячиси Максимилиано Араухони Кукурельяга потенциал ўринбосар сифатида кўриб чиқмоқда. Таъкидланишича, 26 ёшли уругвайлик футболчининг шартномасида 80 миллион евро миқдорида товон пули белгиланган. Бироқ, португаллар ўйинчини 35–50 миллион евро эвазига ҳам қўйиб юборишлари мумкин.
2025/26 йилги мавсумда Араухо барча турнирларда жами 47 та учрашувда майдонга тушиб, 7 та гол урди ва 6 та голли узатмани амалга оширди.
