Odatda transfer oynasi yopilishiga bir necha kun qolganida kutilmagan va katta transferlar amalga oshiriladi. Klublar bu safar ham qiziqarli transferlar bilan bizni zeriktirishmayapti. Quyida esa so‘nggi kunlar "futbol bozori"da qanday transferlar amalga oshirildi va yana nima gaplar bo‘layotgani bilan tanishasiz.
Antoni 100 million yevro evaziga "Manchester Yunayted"ga o‘tadi
Bu sodir bo‘ldi: "Ayaks" vingeri Antoni "Manchester Yunayted"ga o‘tadi! De Telegraaf xabariga ko‘ra, klublar nihoyat 22 yoshli braziliyalikning transferi bo‘yicha kelishib olishgan, kelishuv bonuslar bilan birga 100 million yevroni tashkil etadi. Avvalroq “Ayaks” Antoni uchun “Manchester Yunayted”ning bir qancha takliflarini, jumladan, 90 million yevrolik taklifni ham rad etgan edi.
Futbolchining o‘zi bilan "qizil iblislar" allaqachon 5 yillik shartnoma bo‘yicha kelishib olishgan. Eslatib o‘tamiz, ushbu mavsum oralig‘ida bosh murabbiy Erik ten Xag va himoyachi Lisandro Martines allaqachon "Ayaks"dan "Manchester Yunayted"ga o‘tishgan.
Belotti Rimda
Italiya terma jamoasining 28 yoshli hujumchisi, Yevro-2020 g‘olibi Andrea Belotti "Roma" bilan 2023 yilning yoziga qadar mo‘ljallangan shartnoma imzoladi.
Belotti bungacha “Torino” tarkibida 7 mavsum o‘ynagan va 251 o‘yinda 113 ta gol urgan. Andrea shu yozda erkin agentga aylangandi.
La Gazetta dello Sport: Ronaldu faoliyatini "Napoli"da davom ettiradi
"Manchester Yunayted" hujumchisi Krishtianu Ronaldu "Napoli"ga o‘tishga rozi bo‘ldi. La Gazetta dello Sport xabariga ko‘ra, italyan klubi portugaliyalikni ijaraga oladi va "Manchester Yunayted" uning maoshini to‘liq qoplaydi. O‘z navbatida 23 yoshli hujumchi Viktor Osimhen Neapoldan "Old Trafford"ga o‘tadi. Uning uchun "qizil iblislar" 100 million yevro to‘laydi - xuddi Antoni kabi.
"Atletiko" Forestga jo‘nab ketgan Lodi o‘rniga "Real Madrid" tarbiyalanuvchisi Regilyonni olib keladi
2022 yilgi transfer oynasining asosiy yangiliklaridan biri Nottingem Forest "Atletiko Madrid" chap qanot himoyachisi Renan Lodini sotib olishga yaqin turibdi. Insayder Fabrisio Romanoning so‘zlariga ko‘ra, "o‘rmonchilar" 24 yoshli braziliyalikni 5 million yevroga ijaraga olishgan, uni 30 million yevroga sotib olish ham shartnomaga kiritilgan.
Lodi o‘rniga "matraschilar" "Real" tarbiyalanuvchisi bo‘lgan, "Tottenxem" safida to‘p tepayotgan 25 yoshli Serxio Regilyon bilan shartnoma imzolaydi. Regilyon Diyego Simeone jamoasiga sotib olish huquqisiz ijaraga beriladi.
