Himoyachi Endryu Robertson tizzasidan jarohat oldi va "Liverpul"ning bo‘lajak o‘yinlarini o‘tkazib yuboradi.

Bu haqda "qizillar" bosh murabbiyi Yurgen Klopp gapirib o‘tdi.

“Robbo 100 foiz tayyor emas. U o‘yin oxirida - 93-daqiqada yoki shunday daqiqalarda nimanidir his qildi. Ertasi kuni u nimadir noto‘g‘ri ekanligini tushundi. Lekin ha, men shuni aytgan bo‘lardimki, u hech bo‘lmaganda xalqaro o‘yinlardagi pauzadan keyin qaytib keladi.

Kyortis ham o‘ynashga tayyor emas. Fabiu kecha mashg‘ulot o‘tkazdi, u "Ayaks"ga qarshi maydonga tusha oladi.

Menimcha, Nabi Keyta terma jamoa yig‘iniga bormaydi. U oktyabr oyida qaytishi kutilmoqda. Oksleyd-CHemberlen ham xuddi shunday holatda. Shuning uchun bu yigitlar Chempionlar ligasi o‘yinlari uchun tarkibda yo‘q", - dedi Klopp.

Hozirda "Liverpul"da 8 nafar jarohat olgan futbolchi bor. Bular Jordan Xenderson, Ibrahima Konate, Kyortis Jons, Aleks Oksleyd-CHemberlen, Kiuvin Kellexer, Kalvin Remsi, Nabi Keyta va Endryu Robertson.

"Liverpul" Chempionlar ligasi doirasida o‘z maydonida "Ayaks" bilan o‘ynaydi. O‘yin ertaga, 13 sentyabr kuni bo‘lib o‘tadi va Toshkent vaqti bilan soat 23:59da boshlanadi.