Angliya Premyer-ligasi klublari Angliya kubogida takroriy o‘yinlardan voz kechish, shuningdek, Angliya Liga kubogi formatini o‘zgartirish imkoniyatlarini ko‘rib chiqmoqda, deb xabar beradi Daily Mail.
Bu masalalar chorshanba kungi liga aksiyadorlari yig‘ilishida muhokama qilinadi. Takliflar 2024 yildan boshlab Angliya kubogining uchinchi va to‘rtinchi bosqichlari uchun takroriy o‘yinlarni bekor qilishni o‘z ichiga oladi. Yevrokuboklarda o‘ynaydigan jamoalar Liga kubogida ishtirok eta olmaydi yoki bunday klublar 21 yoshgacha bo‘lgan futbolchilardan iborat tarkibni maydonga tushira oladi.
Premyer-liga bir vaqtning o‘zida bir nechta turnirlarda o‘ynaydigan jamoalar uchun o‘yinlar sonini kamaytirishga umid qilmoqda. Biroq xabarda aytilishicha, tomonlar Liga kubogini to‘liq bekor qilishni yoki Angliya kubogining barcha o‘yinlarini hafta o‘rtasida o‘tkazishni talab qilmaydi.
Qayd etilishicha, o‘zgarishlar kuchga kirishi mumkin bo‘lgan eng yaqin vaqt 2024/2025 yilgi mavsumning boshlanishi hisoblanadi.
