Англия Премьер-лигаси клублари Англия кубогида такрорий ўйинлардан воз кечиш, шунингдек, Англия Лига кубоги форматини ўзгартириш имкониятларини кўриб чиқмоқда, деб хабар беради Daily Mail.

Бу масалалар чоршанба кунги лига акциядорлари йиғилишида муҳокама қилинади. Таклифлар 2024 йилдан бошлаб Англия кубогининг учинчи ва тўртинчи босқичлари учун такрорий ўйинларни бекор қилишни ўз ичига олади. Еврокубокларда ўйнайдиган жамоалар Лига кубогида иштирок эта олмайди ёки бундай клублар 21 ёшгача бўлган футболчилардан иборат таркибни майдонга тушира олади.

Премьер-лига бир вақтнинг ўзида бир нечта турнирларда ўйнайдиган жамоалар учун ўйинлар сонини камайтиришга умид қилмоқда. Бироқ хабарда айтилишича, томонлар Лига кубогини тўлиқ бекор қилишни ёки Англия кубогининг барча ўйинларини ҳафта ўртасида ўтказишни талаб қилмайди.

Қайд этилишича, ўзгаришлар кучга кириши мумкин бўлган энг яқин вақт 2024/2025 йилги мавсумнинг бошланиши ҳисобланади.