"Manchester Yunayted" markaziy himoyachisi Lisandro Martines Argentina terma jamoasining AQSHdagi yig‘iniga yetib borish uchun qirolicha Yelizaveta II vafotidan keyin yopilgan Londondagi AQSH elchixonasida viza ololmadi.

Natijada u hujjatlarni rasmiylashtirish uchun Buyuk Britaniyadan Argentinaga uchishi kerak bo‘ldi (masofa 12 000 kilometr). Endi, Argentinaning OLE nashriga ko‘ra, Martines Mayamiga yo‘l oladi va yana 7280 kilometr masofaga parvoz qiladi.

Shunday qilib, sayohat davomida argentinalik 19 000 kilometr masofani bosib o‘tadi. Taqqoslash uchun, Buyuk Britaniyadan Mayamiga to‘g‘ridan-to‘g‘ri parvoz atigi 7000 kilometrni tashkil qiladi.

Ushbu sayohatlardan so‘ng Martinesga shanba kuni erta tongda Gondurasga qarshi o‘yin oldidan jamoa bilan mashg‘ulot o‘tkazish uchun bor-yo‘g‘i bir kun vaqt bo‘ladi.

Va bu hali hammasi emas - u Nyu-Yorkka (2000 kilometr masofa) uchish uchun yana bir samolyotga chiqishi kerak, u yerda chorshanba kuni (28 sentyabrda) Argentina Yamayka bilan o‘yin o‘tkazadi.

Manchesterga qaytguniga qadar Martines jami 28 000 kilometrdan ortiq masofani bosib o‘tadi. Keyin esa 2 oktyabr kuni "Manchester Siti"ga qarshi yirik o‘yin oldidan "Yunayted" bilan mashg‘ulotlarga qaytishi kerak.

Agar Martines bularning barchasiga qaramay formasini saqlab qola olsa va Manchester derbisida o‘ynasa, bu chinakam qahramonlik bo‘lishi mumkin.