"PSJ" Milan Shkrinyarning "Inter" bilan shartnomasi bo‘yicha muzokaralar to‘xtab qolgani uchun futbolchini qishda sotib olmoqchi.
La Gazette Dello Sport xabariga ko‘ra, "neradzurrilar" 27 yoshli himoyachi bilan yangi shartnoma borasida kelisha olmayapti - muzokaralar to‘xtab qolgan. Slovakiyalik bilan amaldagi kelishuv 2023 yilning yozida tugaydi.
Tomonlar yaqin orada bu masala bo‘yicha muzokaralarga qaytmasa kerak. Eng yaxshi holatda "Barselona" bilan Chempionlar ligasi doirasidagi ikkita o‘yindan keyin muzokaralar davom etadi.
Bunday vaziyatda o‘tgan yozda Shkrinyarni sotib olmoqchi bo‘lgan va unga 70 million yevro taklif qilgan "PSJ" uni yanvarda qo‘lga kiritishga harakat qiladi. Qayd etilishicha, “Inter”da hech kim Shkrinyar qishda klubda qolishiga kafolat bera olmaydi.
Qishki transfer oynasi ochilganda "PSJ" himoyachi uchun 30 mln yevro taklif qiladi.
27 yoshli futbolchi joriy mavsum “Inter” safida barcha turnirlar doirasida 9 ta o‘yinda maydonga tushdi.
