"Barselona" bosh murabbiyi Xavi rahbariyatga "Manchester Siti" yarim himoyachisi Bernardu Silva 2023 yilning yozida kataloniyaliklar jamoasiga o‘tishini istashini aytdi, deb xabar beradi Mundo Deportivo.

Manba bergan xabarga ko‘ra, "ko‘k-anorranglilar" rahbariyati ham 28 yoshli portugaliyalikni jamoada ko‘rishni istaydi.

Qayd etilishicha, Xavi "Barselona"dan pozision futbol tajribasiga ega, shuningdek, jamoaga barqarorlik bera oladigan yetuk yarim himoyachi bo‘lishini istaydi.

Shu bilan birga, yangi futbolchini qo‘lga kiritish uchun Kataloniya klubi muhim futbolchilardan birini sotishi kerak bo‘ladi.

Shuningdek, “shaharliklar” Bernarduni sotishga tayyor bo‘lgan minimal summa – 80 million yevro ekanligi ma’lum qilingan. Bonuslar bilan bu miqdor taxminan 100 million yevroga yetishi mumkin.

Silva ushbu mavsumda "Manchester Siti" safida barcha turnirlar doirasida 10 ta o‘yinda maydonga tushib, 2 ta gol urdi va 3 ta golli uzatmani amalga oshirdi. Yarim himoyachining klub bilan shartnomasi 2025 yilning 30 iyuniga qadar mo‘ljallangan.