Futzal bo‘yicha Tojikiston terma jamoasi bosh murabbiyi Payrov Vahidov O‘zbekiston bilan o‘yindan so‘ng o‘z fikrlarini bildirib o‘tdi.

— O‘yin haqida.
— O‘yindan ko‘nglimiz to‘ldi. Ikkinchi taym yaxshi o‘ynadik, uchrashuv durang bilan yakunlanishi ham mumkin edi. Biroq yakunda O‘zbekiston g‘alaba qozondi. Menimcha, ayrim jabhalarda futzalchilarimga mahorat va sovuqqonlik yetishmadi.

— O‘zbekiston terma jamoasining o‘yini haqida.
— O‘zbekiston bilan bu yil ko‘p bora to‘qnash keldik. Saralash o‘yinlaridan tashqari o‘rtoqlik uchrashuvlari ham o‘tkazdik. Jamoa tarkibida bir qancha tajribali futzalchilar bor. Bu tarkib Jahon chempionatida o‘ynagan. Bu galgi o‘yinda Ropiyev va Nishonov juda ajoyib o‘ynadi.

— Ikkinchi taymdagi o‘zgarishlar.
— Biz ikkinchi bo‘limda yutqazayotgan edik. Shu sababli oyoq bilan yaxshi o‘ynaydigan darvozabonni maydonga tushirdim. Bu bizga qo‘l keldi. Shu sababli imkoniyatlarimiz ko‘paydi va tempni ko‘tara oldik.

— Osiyo kubogidagi favoritlar.
— Bu gal ham musobaqada g‘olib chiqishga O‘zbekiston va Eron jamoalari asosiy da’vogarlardan. Shuningdek, Tayland ham chempionlik uchun kurashadi. Umuman olganda, butun Osiyo bo‘ylab futzal o‘sdi va rivojlanib bormoqda. Buni Vyetnam va Kuvayt misolida ham ko‘rishimiz mumkin.