Londonning “Arsenal” klubi va Germaniyaning Adidas kiyim-kechak brendi hamkorlikni 2030 yilgacha uzaytirdi, deya xabar beradi klub rasmiy sayti.
Ma’lum qilinishicha, “kanonirlar” ayollar jamoasining mashhurligini oshirishga, shuningdek, 2024 yilgacha birinchi navli poliesterni qayta ishlangan poliesterga almashtirish maqsadiga erishishga ko‘proq e’tibor qaratiladi.
Eslatib o‘tamiz, Arsenal va Adidas o‘tgan mavsumda yoshlar o‘rtasidagi zo‘ravonlik sabablariga qarshi kurashishga qaratilgan “No More Red” xayriya kampaniyasini boshlagan edi. 2022/23 yilgi mavsumdagi uy libosining har bir sotuvidan Premyer-liga boshlangunga qadar 5 funt sterling mahalliy hamjamiyat loyihalarini qo‘llab-quvvatlash uchun “kanonirlar” jamg‘armasiga o‘tkazildi.
Eslatib o‘tamiz, tomonlar 2019 yildan beri hamkorlik qilib keladi. Avvalroq, nemis konserni 1986 yildan 1994 yilgacha London klubining texnik hamkori bo‘lgan.
