AGMK jamoasi ustozi Mirjalol Qosimov "So‘g‘diyona" ustidan qozonilgan g‘alabadan (2:0) so‘ng o‘z fikrlari bilan o‘rtoqlashdi.
"Bellashuv haqida gapiradigan bo‘lsam, biz kutgandek jangavor va keskin kurashlarga boy o‘yin bo‘ldi. Har ikki jamoa ham g‘alaba ilinjida maydonga tushgan edi. O‘yinda omad bizga kulib boqdi. "So‘g‘diyona" juda yaxshi shakllangan jamoa hisoblanadi. Tarkibda iqtidorli va tajribali futbolchilar yetarlicha.
Bugun darvozabonimiz Botirali Ergashev juda yaxshi harakat qildi. Birinchi bo‘lim boshida bir qancha vaziyatlarda jamoamizni yaqqol goldan saqlab qoldi. Biz esa o‘zimizda bo‘lgan imkoniyatlardan yaxshi foydalandik. Ikkinchi bo‘lim ham keskin kurashlarga boy bo‘ldi. Darvozamizga penaltidan belgilanganda ham yana Botirali katta sahnaga chiqdi. Bejizga darvozabon yarim jamoa deyilmaydi. Bugungi o‘yin kim gol ursa, o‘sha jamoa g‘alaba qozonadigan bahs edi.
Ushbu o‘yin endi tarixda qoldi. Endilikda kelgusi o‘yinlarga tayyorgarlik ko‘rishimiz zarur. "So‘g‘diyona"ga esa 5 oktyabr kuni bo‘ladigan OFK kubogi yarim final bahsida chin dildan faqat va faqat omad omad tilayman", - dedi Qosimov.
