Futbolda darvozabonlar gohida fantastika qoliplariga ham sig‘mas darajada jasorat ko‘rsatishadi.
To‘g‘ri, bunday qahramonlikda tasodif ulushi ko‘proq bo‘ladi, albatta. Janubiy milliy liga - bu Angliya futbol piramidasidagi 6-darajali divizion. Darvozabon Rayan Sendfordni o‘z tarkibiga qo‘shib olgan «Ueymut» klubi shu ligada o‘ynaydi. E’tiborlisi, «Millioll»ning sobiq kiperi «Bat Siti»ga qarshi kechgan debyutidayoq aqldan ozdiruvchi o‘yin namoyish qildi. U avvaliga penaltini to‘sdi, keyin ketma-ket yana 3ta chiroyli «seyv» ko‘rsatdi.
Bitta achinarli tomoni, Sendfordning 8 soniyaga to‘g‘ri kelgan «megaseyv»lari «Ueymut»ga shunchaki, bir daqiqalik shuhrat keltirdi, xolos. Jamoa dastlabki 10 daqiqada qo‘yib yuborilgan 2ta gol tufayli yakunda 1:2 hisobida yengildi. Aytish kerakki, gol urilgan vaziyatlarda kiperning nimadir qilishi juda qiyin edi. Rayan yaqin-yaqingacha «Milluoll» tizimida shug‘ullanardi. U joriy mavsum boshlanganidan keyingina ijara kelishuvi bo‘yicha 6-divizion klubiga yo‘l oldi. To‘g‘ri, 23 yoshli kiper «Milluoll»da asosiy tarkibga kirolmadi. Vaholanki, u 2 yilcha muqaddam hattoki, Angliya yoshlar terma jamoasiga ham chaqirilgan va Meyson Maunt bilan birga o‘ynagandi. Endi esa biri APLda, ikkinchisi non-ligada, yana ijara safari...
Tabiiyki, «kvadrupl-seyv» (4ta «seyv») videosi darhol ijtimoiy tarmoqlarda keng tarqaldi va darvozabon chin kumirlar e’tirofiga sazovor bo‘ldi:
Gari Lineker: «Bu juda ta’sirli!»
Edvin van der Sar: «Yomon emas».
Sendfordni Angliya terma jamoasi darvozaboni Nik Poup ham olqishladi. Zero, u quyi ligalarda o‘ynash qandayligini yaxshi biladi (Shon Daych boshqaruvidagi «Bernli» safiga qo‘shilishiga qadar «podval»da ijara muddatini o‘tagan). Poupning e’tirofi: «Shunchaki, yuqori saviya!» Ehtimol, Sendford shu qahramonlik ortidan Janubiy milliy liganing eng noshud jamoasida o‘z faoliyatini qayta izga solib, «Milluoll»ga qaytar va loaqal Chempionshipda o‘z o‘rnini topar…
