"Barselona" bosh murabbiyi Xavi Ispaniya chempionatida mehmonda mag‘lubiyatsiz o‘tkazgan ketma-ket o‘yinlar soni bo‘yicha "Real"ning sobiq bosh murabbiyi Zinedin Zidanning rekordini yangilagani haqida fikr bildirdi.

1 oktyabr, shanba kuni Xavi boshchiligidagi “Barselona” safarda “Malyorka”ni mag‘lub etdi (1:0). Kataloniyaliklar mag‘lubiyatsiz safar o‘yinlarini 18 taga yetkazishdi. Zidanning avvalgi rekordi 17 uchrashuv edi.

"Men baxtliman! Biz ajoyib ishlayapmiz. Umid qilamanki, bu rekord keyinchalik unvonga aylanadi. Jamoa yaxshi o‘yin ko‘rsatayotganidan va qiyin uchrashuvlarda xarakter ko‘rsatayotganidan xursandman. Bu biz to‘g‘ri yo‘lda ekanligimizni anglatadi. Agar rekordlar sovrinlarga aylansa, buning ta’mi yanada yaxshi bo‘ladi", - dedi Xavi.

"Barselona" Ispaniya chempionatidagi navbatdagi o‘yinini 16 oktyabr kuni "Real Madrid"ga qarshi o‘tkazadi.