"So‘g‘diyona" bosh murabbiyi Ulug‘bek Baqoyev OFK kubogi yarim final bosqichi doirasida bo‘lib o‘tadigan "Kuala Lumpur Siti" klubiga qarshi o‘yin oldidan o‘z fikrlari bila o‘rtoqlashdi.

"Kuchli raqibga qarshi qiyin o‘yin bo‘lishini kutyapmiz. Biz bir jamoa va oila sifatida birlashganmiz va finalga chiqishni istaymiz.

"Kuala Lumpur Siti"ning kuchli tomonlarini tahlil qildik. Bu jamoa tarkibida sifatli o‘yinchilar borligini bilamiz. Ular minimal imkoniyatdan foydalanishni bilishadi. Biznng vazifamiz esa raqibga gol urish uchun imkoniyat bermaslikdan iborat. Buning uchun esa himoyada bexato harakat qilishimiz lozim. Yaxshi himoyalangan va xatoga yo‘l qo‘ymagan holda g‘alaba qozonishni istaymiz.

Raqibning himoyadan hujumga o‘tishi juda tez. Bu jarayonda ular to‘pni deyarli yo‘qotishmaydi. Ular e’tiborni qarshi hujumga qaratishadi va imkoniyatni qo‘ldan chiqarishmaydi. "Mohan Bogan"ga qarshi o‘yinda ularni to‘pni ko‘p nazorat qilishmadi, ammo tezkor qarshi hujumga o‘tib, o‘z imkoniyatlaridan foydalanishdi va g‘alaba qozonishdi. Bu esa "Kuala Lumpur Siti"ning kuchli jihati hisoblanadi.

"Albatta, ichki chempionatdagi so‘nggi natijalarimiz ijobiy bo‘lmayotgani hafsalamizni pir qiladi. Ammo chempionatda yo‘qotilgan ochkolarning o‘rnini to‘ldirish imkoniyati mavjud. OFK kubogida esa bunday imkoniyat bo‘lmaydi. Ertaga muxlislarimizni xursand qilamiz, degan umiddaman", — dedi Baqoyev.