O‘zbekiston futzal milliy terma jamoasi a’zosi Davron Choriyev Osiyo chempionatining chorak finalida bo‘lib o‘tgan Kuvaytga qarshi o‘yindan so‘ng o‘z fikrlari bilan o‘rtoqlashdi.

"O‘yin biz uchun og‘ir bo‘ldi. Kuvayt yaxshi shakllangan va yildan-yilga o‘sib borayotgan jamoa hisoblanadi. Birinchi bo‘limda vaziyatlarni golga aylantira olmaganimiz uchun biroz qiynaldik. Ikkinchi bo‘limda esa o‘z maqsadimizga erishdik.

Mezbonga jamoaga qarshi o‘ynash hamisha qiyin bo‘ladi. Bizdagi hayajon tufayli ham ba’zi vaziyatlarni golga aylantira olmadik.

Jamoamizda birdamlik va hamjihatlik yaxshi yo‘lga qo‘yilgan. Bir-birimizni yaxshi tushunamiz. O‘yin paytida bir-birimizni qo‘llab-quvvatlashga harakat qilamiz.

Ha, bugun yanada ko‘proq gol urishimiz mumkin edi. Yaponiyaga qarshi bo‘ladigan keyingi o‘yinga yaxshi tayyorgarlik ko‘rishga harakat qilamiz", — dedi Davron Choriyev.