"Real" bosh murabbiyi Karlo Anchelotti hujumchi Karim Benzema Chempionlar ligasi guruh bosqichi 3-turi doirasidagi "Shaxtyor"ga qarshi o‘yinni asosiy tarkibda boshlashini ma’lum qildi.
"Oktyabr har doim Ispaniya chempionatida ham, Chempionlar ligasida ham muhim o‘yin davri hisoblanadi. Umid qilamizki, bizda kuchli tarkib bor. Karim Benzema hozir yaxshi. U asosiy tarkibda bo‘ladi. U hozir ajoyib jismoniy holatda. Oxirgi o‘yinlarda o‘ynamagani uchun gol ura olmadi. Lekin mashg‘ulotlarda o‘zini yaxshi ko‘rsatdi. Ko‘ramiz, u o‘zini odatdagi formada - ajoyib futbolchi sifatida ko‘rsata oladimi", - deya Anchelotti so‘zlarini keltiradi UYEFA sayti.
Hujumchi 6 sentyabr kuni Chempionlar ligasi doirasidagi "Seltik"ga qarshi o‘yinda (3:0) jarohat olgandi. 2 oktyabr kuni u "Osasuna"ga qarshi o‘yinda (1:1) jarohat olganidan keyin birinchi marta La Ligada o‘ynadi va penaltini aniq amalga oshira olmadi. 34 yoshli futbolchi “Real” safida barcha turnirlar doirasida 6 ta o‘yinda maydonga tushib, 3 ta gol urdi va 1 ta golli uzatmani amalga oshirdi.
