O‘zbekiston futzal milliy terma jamoasi bosh murabbiyi Bahodir Ahmedov Osiyo chempionatining yarim finalida bo‘lib o‘tgan Yaponiyaga qarshi o‘yindan avval matbuot anjumanida ishtirok etdi.

"Yarim finalga chiqqan barcha jamoalarni tabriklayman. Yaponiya — Osiyodagi eng kuchli jamoalardan biri. Ertangi o‘yin og‘ir kechishini kutyapmiz. Boisi, Yaponiya taktik jihatdan kuchli jamoa. Bu jamoaning har bir o‘yinchisidan ko‘p narsa kutish mumkin.

Yaponiyaning hozirgi yosh tarkibi to‘g‘ri yo‘ldan ketyapti, deb o‘ylayman. Bizning futzalchilar ham ertangi o‘yinga tayyor. G‘alaba uchun maydonga chiqib, qo‘limizdan kelgan barcha ishni qilamiz.

Avvalgi musobaqalarda erishgan natijalarimiz tarixda qolgan. Ertangi bahs biz uchun katta mas’uliyat. Biz statistikaga e’tibor bermasdan, yaxshi o‘yin ko‘rsatgan holda g‘alaba qozonishga intilamiz.

O‘yinchilarni ruhiy va jismoniy jihatdan yaxshi tayyorlashga harakat qilyapmiz. Mazkur o‘yinning mas’uliyatini yigitlar yaxshi tushunib turishibdi. Jamoa shifokorlari va jismoniy tayyorgarlik bo‘yicha murabbiylarimiz futzalchilarni ertangi bahsga yaxshi tayyorlashmoqda", — dedi Ahmedov.