Ўзбекистон футзал миллий терма жамоаси бош мураббийи Баҳодир Аҳмедов Осиё чемпионатининг ярим финалида бўлиб ўтган Японияга қарши ўйиндан аввал матбуот анжуманида иштирок этди.

"Ярим финалга чиққан барча жамоаларни табриклайман. Япония — Осиёдаги энг кучли жамоалардан бири. Эртанги ўйин оғир кечишини кутяпмиз. Боиси, Япония тактик жиҳатдан кучли жамоа. Бу жамоанинг ҳар бир ўйинчисидан кўп нарса кутиш мумкин.

Япониянинг ҳозирги ёш таркиби тўғри йўлдан кетяпти, деб ўйлайман. Бизнинг футзалчилар ҳам эртанги ўйинга тайёр. Ғалаба учун майдонга чиқиб, қўлимиздан келган барча ишни қиламиз.

Аввалги мусобақаларда эришган натижаларимиз тарихда қолган. Эртанги баҳс биз учун катта масъулият. Биз статистикага эътибор бермасдан, яхши ўйин кўрсатган ҳолда ғалаба қозонишга интиламиз.

Ўйинчиларни руҳий ва жисмоний жиҳатдан яхши тайёрлашга ҳаракат қиляпмиз. Мазкур ўйиннинг масъулиятини йигитлар яхши тушуниб туришибди. Жамоа шифокорлари ва жисмоний тайёргарлик бўйича мураббийларимиз футзалчиларни эртанги баҳсга яхши тайёрлашмоқда", — деди Аҳмедов.