Bundan bir yoki ikki yil ilgari turli platformalarda uning o‘yini avvalgidek emasligi haqida aytib boshlaganimizda bizni xeytlarga ko‘mib tashlashar, kurakda turmaydigan so‘zlar bilan haqoratlashar edi. Bugun esa balki o‘sha muxlislarning o‘zi ham voqeylikni qabul qila boshlab, ba’zilar hatto endi Ronalduni ustidan kulib boshlashgach, kishining biroz g‘ashi kelmoqda.

Ronaldu isbotlashi kerak bo‘lgan narsasi qolmagan futbolchi. Ha, u va uning daraja jihatdan doimiy hamrohi ham jahon chempioni bo‘lmagan, ammo zamonaviy futbolda tugal afsona bo‘lish uchun bu shart emas, menimcha.

O‘shanda ham, hozir ham biz Krishtianuni hurmat qilganimiz uchun munosabatlarda kuyinganmiz. Faoliyatini vaqtida yakunlash haqida mulohaza qilganmiz. Ishimiz shu, fikr bildiramiz, fikr qabul qilamiz, bahslashamiz, qo‘shilmaymiz yoki qo‘shilamiz — tabiiy.

Kecha Messi bo‘lajak mundial o‘zi uchun oxirgisi bo‘lishini aytibdi. Ronaldu hali bunday deganicha yo‘q. Lekin ynda ham shunday o‘y bo‘lsa ajablanmayman.

Juda istardim, Qatar-2022 ikkisi uchun muvaffaqiyatli o‘tishini. Bu qiyindir, ilojisi yo‘qdir, lekin natija o‘laroq bo‘lmasa ham, o‘yin e’tibori bilan shunday o‘tsin. Ular gollar ursin, jamoachini uzoqroqqa olib borsin. Biri agar uddalasa chempion qilsin. Xullas, yakun futbol ma’nosida go‘zal o‘tsin.

Orif Tolipov.