Braziliyalik 40 yoshli Kaka Germaniyada ommaviy marafonda qatnashib, o‘z so‘zi ustidan chiqdi - birinchi urinishdayoq 3 soatu 40 daqiqaga yetmay, marra chizig‘ini bosdi.

 «Oltin to‘p» sohibi bunda 45 ming (!!!) kishi orasida yugurganini alohida ta’kidlash joiz.

Sddeutsche Zeitung nashrining DPA manbasiga tayanib, xabar berishicha, braziliyalik sobiq futbolchi marafon startidan oldin 42195 metrga teng masofani 3 soatu 40 daqiqadan kam vaqtda bosib o‘tishi haqida baralla gapirgandi. Va’daga vafo - fao­liyati davomida «Milan» va «Real» klublari hamda Braziliya milliy jamoasida yorqin iz qoldirgan Kaka finish marrasiga 3 soat 38 daqiqa 6 soniya­da yetdi. Qo‘shimcha qilinishicha, bu debyutant marafonchi uchun munosib ko‘rsatkich hisoblanadi.

Kaka marafondan keyin o‘z taassurotlari bilan o‘rtoqlashar ekan, masofani bosib o‘tishda aslo qiynalmaganini aytdi: «Professional sportdan olgan asosiy narsam - bu mentalitet. To‘g‘ri, yillar davomida jismim boshqacha harakatga o‘rgangandi. Muhimi, bugun ortiqcha qiynalmadim».

Germaniyadagi eng ommaviy va yirik marafonda chamasi 45000 kishi qatnashdi. Asosiysi, yakshanba kungi yugurishda jahon rekordi ham o‘rnatildi - Eliud Kipchoge belgilangan masofani bosib o‘tishga atigi 2 soat 1 daqiqa 9 soniya sarfladi.