Superliga 22-turi doirasidagi «Dinamo» - «Metallurg» (0:1) uchrashuvidan keyin Vadim Abramov o‘yin borasidagi fikrlari bilan o‘rtoqlashdi.

«O‘yin haqida nima deyishim mumkin? Yomon o‘yin ko‘rsatdik, tabiiyki bu g‘alaba uchun yetarli bo‘lmadi. Har qanday gapim mag‘lubiyatga bahona izlashdek bo‘lib qolishi mumkin. Muxlislardan uzr so‘rayman. Chunki ularni g‘alaba bilan xursand qilishni uddalay olmayapmiz.

Afsuski, qo‘l ostimizdagi bor imkoniyatdan foydalanib, to‘p suryapmiz. Tarkibimizdagi 19 o‘yinchidan 6 nafari yosh, 3 nafar o‘yinchi esa betobligiga qaramay o‘ynashga majbur bo‘lmoqda.

Ha, aksiga olib Boydullayev va Abdurahmonov chetlatish sabab keyingi o‘yinda bo‘lmaydi. Ularning o‘rnini tarkibda bor yoshlar bilan to‘ldirishga majburmiz. Tarkibda betob o‘yinchilar ko‘p, ularning aksarini maydonga tushirishga majburmiz, aksariyati esa o‘ynamadi.

Bugungi o‘yinimizdan tashqari, avvalgi har o‘yinimizda darvozamiz tomon penalti tepishdi. Bu penalti emas demoqchi emasman, shunchaki hozirgi vaziyatimiz, holatimiz shunday. Oldin hech bir klubda bu vaziyatga tushmaganman.

Mahmudxojiyev nega darhol zaxiraga olindi? U o‘yinga kirishib keta olmadi. Tarkibni kuchaytirish uchun yetarli zaxira imkoniyatiga ega emasmiz. O‘yinda qandaydir o‘zgarish yasashga urinayapmiz, ammo buning iloji bo‘lmayapti.

Abdujamol Isroilov nega o‘yin boshida almashtirildi? Jarohatiga qaramay, uni maydonga tushirgan edik. Ammo darhol ko‘rindi – u o‘ynay olmasdi. Uni zaxiraga olishga majbur bo‘ldik. Afsuski, hozirda shunaqa vaziyatdamiz, - deydi «Dinamo» bosh murabbiyi Vadim Karlenovich.