Суперлига 22-тури доирасидаги «Динамо» - «Металлург» (0:1) учрашувидан кейин Вадим Абрамов ўйин борасидаги фикрлари билан ўртоқлашди.

«Ўйин ҳақида нима дейишим мумкин? Ёмон ўйин кўрсатдик, табиийки бу ғалаба учун етарли бўлмади. Ҳар қандай гапим мағлубиятга баҳона излашдек бўлиб қолиши мумкин. Мухлислардан узр сўрайман. Чунки уларни ғалаба билан хурсанд қилишни уддалай олмаяпмиз.

Афсуски, қўл остимиздаги бор имкониятдан фойдаланиб, тўп суряпмиз. Таркибимиздаги 19 ўйинчидан 6 нафари ёш, 3 нафар ўйинчи эса бетоблигига қарамай ўйнашга мажбур бўлмоқда.

Ҳа, аксига олиб Бойдуллаев ва Абдураҳмонов четлатиш сабаб кейинги ўйинда бўлмайди. Уларнинг ўрнини таркибда бор ёшлар билан тўлдиришга мажбурмиз. Таркибда бетоб ўйинчилар кўп, уларнинг аксарини майдонга туширишга мажбурмиз, аксарияти эса ўйнамади.

Бугунги ўйинимиздан ташқари, аввалги ҳар ўйинимизда дарвозамиз томон пенальти тепишди. Бу пенальти эмас демоқчи эмасман, шунчаки ҳозирги вазиятимиз, ҳолатимиз шундай. Олдин ҳеч бир клубда бу вазиятга тушмаганман.

Маҳмудхожиев нега дарҳол захирага олинди? У ўйинга киришиб кета олмади. Таркибни кучайтириш учун етарли захира имкониятига эга эмасмиз. Ўйинда қандайдир ўзгариш ясашга уринаяпмиз, аммо бунинг иложи бўлмаяпти.

Абдужамол Исроилов нега ўйин бошида алмаштирилди? Жароҳатига қарамай, уни майдонга туширган эдик. Аммо дарҳол кўринди – у ўйнай олмасди. Уни захирага олишга мажбур бўлдик. Афсуски, ҳозирда шунақа вазиятдамиз, - дейди «Динамо» бош мураббийи Вадим Карленович.