Superliganing 22-turidan o‘rin olgan “Lokomotiv” – “Olimpik” (1:2) uchrashuvidan so‘ng mehmon jamoa bosh murabbiyi Timur Kapadze o‘z shogirdlarining noodatiy “kasalligi”, ularning jismoniy holati va “Lokomotiv”ning Superligadagi imkoniyatlari haqida gapirdi.

“Superligada oson o‘yinning o‘zi yo‘q. Raqib hozirgi holatida bor kuchini berib o‘ynashini bilar edik va shunga yarasha tayyorgarlik ko‘rgan edik. Birinchi bo‘lim qiyin kechdi. Darvozamizdan tezkor gol o‘tkazib yubordik. Bu bizning “kasalligimiz”. Raqibga gol urishga imkon berib, keyingiga vaziyatni o‘nglayapmiz. Bugun ham shunday bo‘ldi. Shunga qaramay bugun g‘alaba qozondik. Ikkinchi bo‘limni deyarli xatolarsiz o‘tkazdik”, - dedi murabbiy.

“Menga murabbiy sifatida futbolchilarni bir jamoa safida o‘ynab turganlari yaxshi. Chunki, mening qo‘l ostimda o‘ynasalar imkoniyatlarini baholay olaman. Kuchliroq jamoalarda ularga o‘yin vaqti kafolatlanmagan. Muhim musobaqalarga tayyorgarlik ko‘rayapmiz. Shu bois, ularning bir jamoa safida o‘ynab turishlari yaxshiroq deb o‘ylayman”.

“Mening shogirdlarim charchoq nimaligini bilishmaydi. Ularga mashg‘ulotlarda zarur yuklamalarni berayapmiz va jismoniy holatlarini yaxshi ushlab turishlariga harakat qilayapmiz. Agar e’tibor qilsangiz, biz emas, balki raqiblar bizga qarshi o‘yinlarda ko‘proq charchashayapti”

“Lokomotiv” menga begona emas. Stadionga kelsam, o‘z uyimga kelgandek bo‘laman. Ularning hozirgi holatidan havotirdaman, albatta. Bu jamoani Superligada ko‘rmaslik g‘alati. O‘ylaymanki, ularda hamon imkoniyat bor va ular Superligada qoladi" - dedi Kapadze.