"Liverpul"ning sobiq futbolchisi Jeymi Karrager "Manchester Yunayted" ustozi Erik ten Xagning ishidan mamnun.
Joriy mavsum boshlanishidan avval “qizil iblislar” boshqaruvini qabul qilib olgan niderlandiyalik mutaxassis Krishtianu Ronalduni navbatdagi o‘yin va jamoa bilan mashg‘ulotlaridan chetlatdi. Bunga portugaliyalik futbolchining "Tottenxem" bilan o‘yinda zaxiradan maydonga tushishdan bosh tortishi va final hushtagi chalinguncha kiyim almashtirish xonasiga ketishi sabab bo‘ldi.
"Mavsumning boshi ten Xag uchun qiyin bo‘ldi, lekin u tezda maydonda ham, maydon tashqarisida ham o‘z obro‘sini tikladi. "Tottenxem"ga qarshi o‘yin "Manchester Yunayted" uchun so‘nggi yillardagi eng yaxshi o‘yinlardan biri bo‘lib, Ronaldu bilan bo‘lgan voqealarda ten Xag juda zo‘r qarorlarni qabul qilmoqda", - deb yozdi Karrager ijtimoiy tarmoqlarda.
