“Metallurg” kuchlilar ligasida "Neftchi" bilan 43 bora to‘qnash kelgan. O‘zaro uchrashuvlarning 24 tasida farg‘onaliklar, 10 tasida bekobodliklar g‘alaba qozonishgan. 9 ta o‘yin esa durang natija bilan yakunlangan. Kiritilgan va o‘tkazib yuborilgan to‘plar nisbati vodiy jamoasi foydasiga – 75:40. O‘zaro o‘yinlarda “Neftchi” 81, “Metallurg” esa 39 ochko jamg‘argan.

Bekobodda o‘tkazilgan bahslarda mezbonlar 8 ta o‘yinda zafar quchgan, 7 ta o‘yinda durang qayd etilgan. 6 uchrashuvda esa mehmonlarning qo‘li baland kelgan. Kiritilgan va o‘tkazib yuborilgan to‘plar farqi 24:23, bekobodliklar foydasiga.

Bekobodda o‘tgan so‘nggi beshta uchrashuv:

28.07.2018.  «Metallurg» - «Neftchi»  1:0
25.11.2017.  «Metallurg» - «Neftchi»  1:0
22.11.2016.  «Metallurg» - «Neftchi»  1:0
11.04.2015.  «Metallurg» - «Neftchi»  0:1
03.05.2014.  «Metallurg» - «Neftchi»  2:1

“Neftchi” haqida

“Neftchi” FKga 1962 yilda asos solingan. Jamoa “Neftyanik” nomi ostida ikkinchi liga, befer zona hamda birinchi liga musobaqalarida ishtirok etgan. O‘zbekiston mustaqillikka erishgandan so‘ng qatorasiga 4 marta mamlakat chempioni bo‘lgan. Xalqaro musobaqlarda mamlakatimiz sharafini munosib himoya etgan: MDH chempionlari kubogining finalchisi (1994), Osiyo klublar chempionati bronza medali sovrindori (1994/95) bo‘lgan.

O‘zbekiston chempionatlarida “Neftchi” bugungacha 825 ta uchrashuv o‘tkazgan: shulardan 479 tasida g‘alabaga erishgan, 134 tasida duranga imzo chekkan, 212 o‘yinni esa boy bergan. Kiritilgan va o‘tkazib yuborilgan to‘plar farqi – 1593:887. Chempionatdagi eng yirik g‘alabasi – 8:0 (“Afrosiyob”, 1997), eng yirik mag‘lubiyati – 0:6 (“Paxtakor”, 2017).