O‘zbekiston Coca Cola Superligasining 23-turidan o‘rin olgan bahsda “Navbahor” o‘z maydonida Toshkentning “Olimpik” klubini qabul qiladi.

“Olimpik” Superliganing yangi a’zosi bo‘lganligi, “lochinlar” bilan milliy chempionatimiz bahslarida endigina ikkinchi marta to‘qnash kelayotganligi bois, bo‘lajak raqib borasida batafsil to‘xtalib o‘tishni ma’qul deb topdik.

“Olimpik” 2021 yilda O‘zbekiston Milliy olimpiya qo‘mitasi (MOQ) va O‘zbekiston Futbol assosiasiyasi (O‘FA) tashabbusi bilan 2024 yil Parijda bo‘lib o‘tadigan yozgi Olimpiada o‘yinlariga puxta hozirlik olib borish maqsadida, olimpiya terma jamoasiga nomzod futbolchilardan  tuzildi va o‘tgan mavsumda Pro-ligada ishtirok etib, 3-o‘rinni qo‘lga kiritdi hamda Superligaga o‘tish bahsida Muborakning “Mash’al” klubini 3:1 hisobida mag‘lubiyatga uchratib, joriy mavsumdan Superligada qatnashmoqda.

Ayni paytda “Olimpik” tarkibida 2001 va 2002 yilda tavallud topgan futbolchilar to‘p tepishmoqda. Jamoani esa yaqin o‘tmishning mashhur futbolchilaridan biri bo‘lgan Temur Kapadze boshqarmoqda.

“Olimpik” jamoasining chempionatdagi asosiy maqsadi – futbolchilarni shakllantirish, yangi nomlarni kashf qilish, yosh iste’dodlarga zarur o‘yin amaliyotini taqdim etishdan iborat. Rejaga ko‘ra, mazkur jamoa har yili o‘z yosh toifalarida qit’a musobaqalarida ishtirok etib, tajriba orttirishi ko‘zda tutilgan.

Xabaringiz bor, yozda yurtimizda bo‘lib o‘tgan U-23 terma jamoalari o‘rtasidagi Osiyo chempionatida O‘zbekiston U-23 termasi tarkibi o‘zagini “Olimpik” futbolchilari tashkil etishdi hamda U-23 terma jamoamiz finalga qadar yetib borib, vise-chempionlikni qo‘lga kiritdi. Mazkur musobaqada mahoratlarini oshirgan yigitlar 2023-2024 yillarda Parij Olimpiadasiga yo‘llanma beruvchi musobaqalarda ishtirok etishadi. Qayd etish joiz, aynan 2001 va 2002 yilda tavallud topgan futbolchilar 2024 yilgi Olimpiada o‘yinlarida ishtirok etishlari mumkin.

O‘zbekiston – U-23 olimpiya termasi 2024 yilda bo‘lib o‘tadigan U-23 Osiyo chempionati musobaqasida muvaffaqiyatli ishtirok etib, yarim finalga qadar yetib borsa, yurtimiz tarixida ilk bor Olimpiada yo‘llanmasi qo‘lga kiritiladi.

Mazkur jamoalarning 1-davrada Toshkentdagi “Lokomotiv” stadionida bo‘lib o‘tgan bahsida 1:1 hisobidagi durang natija qayd etilgan, namanganliklarning goliga uchrashuvning 2-daqiqasida mahoratli yarim himoyachi Jamshid Iskanderov mualliflik qilgan bo‘lsa, 39-daqiqada “Olimpik” hujumchisi Po‘latxo‘ja Xoldorxonov hisobni tenglashtirtirgandi.             

Eslatib o‘tamiz, “Navbahor” – “Olimpik” uchrashuvi 25 oktyabr kuni Namangandagi “Markaziy” stadionida soat 18:30 da start oladi.