"Paxtakor" hujumchisi Dragan Cheran "Lokomotiv"ga qarshi kechgan (2:1) o‘yindan so‘ng klub matbuot xizmatiga intervyu berdi.
Dragan, g‘alaba bilan tabriklayman. Bu o‘yinda ham gol urdingiz, to‘puparlik poygasida natijangiz yana yaxshilandi.
- Derbi har doim derbi, doim muhim va qiyin bo‘ladi. Pressing orqali o‘ynashga harakat qildik va bu natija berdi. Birinchi bo‘limdayoq ikki gol urishga erishdik. Ikkinchi bo‘limda esa to‘pni raqibga berishga qaror qildik va o‘yin nazoratini ushlab qola oldik. Shu sabab ikkinchi bo‘lim biroz zerikarli bo‘lgandir, lekin futbolda muhimi natija va biz unga erishdik.
So‘nggi o‘yinlarda jamoa ancha yorqin ko‘rinmoqda, vaziyatlardan foydalanishda muammolardan xalos bo‘lgandek. Jamoada kayfiyat qanday?
- Jamoadagi muhit yaxshi. Murabbiy tizimiga va taktikasiga moslashayapmiz. Natijalar ham yomon emas nazarimda. Jamoa bir taktikaga ko‘nikishi uchun ma’lum vaqt kerak. Ushbu mavsumni yaxshi yakunlab, keyingi mavsumda natijalarimiz bundan yaxshiroq, o‘yinimiz esa bundanda yorqinroq bo‘ladi deb umid qilaman.
Superligada uch mavsumdan buyon eng yaxshisiz. Bu yil ham shu an’anani davom etirasizmi?
- Albatta, men qolgan uchta o‘yinda jamoaga maksimal tarzda yordam berishga harakat qilaman va birinchi maqsadim jamoa bilan bog‘liq. Qolgan uchrashuvlarda g‘alaba qozonib, chempionlikni qo‘lga kiritishga urinamiz. To‘puparlar bahsida bu yil ham g‘olib bo‘lishga harakat qilaman va bu natijani yana ham yaxshilashga va’da beraman.
