Hozirgina Superliganing 23-turidan o‘rin olgan uchta qiziqarli uchrashuv yakuniga yetdi.

Kecha turning ikkita uchrashuvi "Surxon" - "Qizilqum" (2:0) hamda "Paxtakor" - "Lokomotiv" (2:0) jamoalari o‘rtasida bo‘lib o‘tgandi.

Bekobodda "Metallurg" "Neftchi" jamoasi bilan bellashib, kichik hisobda g‘alaba qozondi va o‘z hisobiga navbatdagi uch ochkoni yozdirib qo‘ydi.

Bugun esa chempionlik uchun kurash olib borayotgan "Navbahor" hamda "Nasaf" jamoalari o‘z maydonida o‘yin o‘tkazishdi. Namanganda "Navbahor" yetakchi jamoalarning haqiqiy bosh og‘rig‘iga aylangan "Olimpik" jamoasi qarshiligini yenga olmadi. Aniqroq qilib aytganda, mag‘lubiyatdan arang qutulib qoldi. Jamshid Iskanderovning Messi uslubida jarima zarbasini amalga oshirishi, "Navbahor"ni o‘z maydonida sharmanda bo‘lishdan saqlab qoldi.

Qarshida esa "Nasaf" "Bunyodkor" bilan bellashdi. Avvaliga Jasur Hakimov "Nasaf" darvozasini ishg‘ol qilib, toshkentliklarni oldinga olib chiqqan bo‘lsa, ikkinchi bo‘lim boshida Xusayn Norchayev muvozanatni tikladi.

Bellashuvning qo‘shib berilgan daqiqalari o‘tib borayotgan pallada o‘yin bosh hakami Timur To‘xtasinov toshkentliklar darvozasiga penalti belgiladi. "Nasaf" jamoasining serbiyalik legioneri Marko Stanoyevichning yo‘llagan zarbasini "Bunyodkor" posboni Suhrob Sultonov qaytarib qoldi va jamoasini mag‘lubiyatdan qutqarib qoldi.

"Navbahor" va "Nasaf"ning ochko yo‘qotishlaridan keyin "Paxtakor"ning kecha "Lokomotiv" ustidan qozongan g‘alabasi bugun juda qo‘l keldi.

Ertaga bo‘lib o‘tadigan "Qo‘qon-1912" - "So‘g‘diyona" hamda AGMK - "Dinamo" jamoalari o‘rtasidagi bellashuv 23-tur o‘yinlariga yakun yasab beradi.

Superliga qizg‘in pallaga kirmoqda.