"Arsenal" bosh murabbiyi Mikel Arteta mavsumni omadli boshlagan edi. Shu sababdan bu yurishni davom ettirishni istaydi. Buning uchun esa u yanvar oyida, hech bo‘lmaganda ikkita yirik xaridni amalga oshirishni reja qilgan. Klub egasi Sten Kronke bu harakatni qo‘llab-quvvatlaydi. Yirik tadbirkor o‘z klubiga yangi transferlar uchun mablag‘ ajratishga tayyor ekanini bildirgan. Arteta yozda 130 million funt evaziga Gabriel Jezus, Oleksandr Zinchenko, Fabiu Viyeyra, Mett Tyorner hamda Markinyosni xarid qilgandi.
"Arsenal"ning ko‘pchilik muxlislari jamoasini hali ham chempionlik kurashida qatnashayapti deb hisoblamaydi. Boz ustiga, jamoa so‘nggi turda "Sautgempton"ga imkoniyatni boy berdi va eng yaqin ta’qibchisi bo‘lgan "Manchester Siti"ni o‘ziga ancha yaqinlashtirib qo‘ydi. Ammo mavsumning to‘rtdan bir qismi ortda qolgan bir paytda, "Arsenal"ning hali ham yetakchilik qilayotgani, ko‘pchilikda jamoaning chempionlikka bo‘lgan da’vosi haqida taassurot uyg‘onishiga sabab bo‘ldi.
Ayni paytda Mikel Arteta APL bahslarida asosan 15 ta futbolchisi xizmatlaridan foydalanmoqda. Ammo bu yetarli bo‘lmasligi aniq. Jamoa tarkibni yanada kuchaytirishga muhtoj.
"Arsenal" yozda "Aston Villa" yarim himoyachisi Duglas Luisga taklif yuborgan edi. Ammo bu harakat ish bermagan. Luis hozir birmingemliklar bilan yangi, uzoq muddatlik bitim tuzib oldi. Shu sabab Londonliklar o‘z e’tiborini boshqa tomonga qaratishga qaror qildi. Endilikda, "to‘pchilar" Braziliyadan yana bir futbolchi xarid qilishi mumkin. "Palmeyras" yarim himoyachisi Danilo "Arsenal" uchun yaxshi tanlov bo‘ladi. 21 yoshli futbolchi uchun London klubi 22 million funtdan voz kechishga tayyor ekani aytiladi. Biroq, "Palmeyras"da Daniloni sotish borasida hech qanday reja mavjud emas. "Arsenal" ham anoyilardanmas. Hademay Braziliyada mavsum yakunlanadi. Dam olishda esa ingliz klubi 26 milliongacha narxni oshirib, Daniloni o‘z tarkibiga qo‘shib olish varianti ham ishlab chiqqan.
"Arsenal"ning nishonidagi yana bir nomlardan biri bu Doneskning "Shaxtyor" klubi futbolchisi Mixail Mudrikdir. Ukrainalik yosh talant yanvar oyida APLga kelsa, ajablanmaslik kerak. Agar bu ish ham o‘xshamasa, u holda "Vilyarreal" iqtidori Yeremi Pino ham mavjud. Ispaniyalik yosh hujumchi 25 million funt atrofida bo‘lishi aytilgan. Kuzatamiz, "Arsenal" qishda qay bir rejasini amalga oshirishga muvaffaq bo‘larkin. Harxolda, jamoada hali ham APL chempioni bo‘lishga o‘ta qulay imkoniyat mavjud.
ISMATOV J.
