«Paxtakor» tarbiyalanuvchisi va «Spartak» klubi sobiq hujumchisi Valeriy Kechinov 1998 yili «Bayer» safiga qo‘shilishga yaqin kelgan ekan. Bu haqda uning o‘zi so‘zlab berdi:

«UEFA kubogidagi muvaffaqiyatli mavsumdan keyin menda «Bayer»ga o‘tish imkoni tug‘ilgandi. Ko‘plab klubdoshlarim o‘sha vaqt xorijdan taklif olishdi, lekin hamma qolishni ma’qul ko‘rdi. «Inter»ga qarshi o‘yindan keyin o‘zimni Leverkuzenda ko‘rdim. Faqat jamoa emas, operasiya stolida. Jarrohlik amaliyotidan so‘ng jamoaning o‘sha paytdagi bosh murabbiyi Kristof Daum oldimga kirib, dalda bergani esimda: «Agar shu jarohatga yo‘liqmaganingda, seni aniq sotib olardik». Daum shuning barobarida menga «Bayer» futbolkasini sovg‘a sifatida bergandi».

Ma’lumot uchun, Valeriy Kechinov 1992-1993 yillar davomida «Paxtakor» sharafini himoya qilib, 38ta o‘yinda 30ta gol urgan va O‘zbekiston chempioni bo‘lishdan tashqari, birinchi mavsumda bosh to‘purarga aylangan. 1993 yili esa «Spartak» bilan shartnoma tuzgan hujumchi bir necha mavsum Moskva klubi yetakchilaridan biri bo‘lgan. Har holda, Kechinov «Spartak»ning 157ta o‘yinida 44ta gol va 10ta samarali uzatma qayd etgan, qolaversa, Rossiya chempionatida 6 marta zafar quchgan.