Osiyo futbol konfederasiyasi qit’aning klublar miqyosidagi eng nufuzli musobaqasi — Osiyo chempionlar ligasi formatini o‘zgartirishga qaror qildi. Yangi format haqida Alisher Nikimbayev o‘zining telegramdagi kanali orqali xabar berdi.

Demak, 2024/2025 yilgi mavsumdan boshlab OCHLning guruh bosqichida jami 24ta jamoa ishtirok etishi kutilmoqda (hozirda guruh bosqichida 40ta jamoa ishtirok etadi; o‘zi 2021 yildan boshlab 32tadan 40taga o‘tgandi). Bunda jamoalar faqat 2ta guruhga — G‘arb va Sharq guruhlariga bo‘linishadi. Har bir guruhda 12tadan jamoa bo‘ladi. O‘yinlar shaxmatda qo‘llaniladigan "shveysarcha" tizimda o‘tkazilishi rejalashtirilmoqda.

Bunday formatda barcha mamlakatlarga ajratiladigan kvotalar soni kamayadi. Klublar reytingida dastlabki 2ta pog‘onani band etgan mamlakatlarga guruh bosqichiga 2ta o‘rin beriladi va pastga qarab tushgan sari kvotalar kamayib boradi.

OCHL guruh bosqichida klublar soni kamaytirilganidan keyin OFK yangi musobaqani tashkil etmoqda. Klublarning uchinchi musobaqasiga OFK prezidenti kubogi nomi beriladi (bir paytlar shunday nomdagi musobaqa bo‘lardi).

Chempionlar ligasi — 24ta klub (guruh bosqichidagi klublar soni)

OFK kubogi — 32

OFK prezidenti kubogi — 20

Yangi formatda OCHL saralash bosqichida yutqazgan jamoalar to‘g‘ridan-to‘g‘ri OFK kubogi guruh bosqichiga o‘tadi.