"Chelsi" jarohat olgan Ris Jeymsning o‘rniga yangi futbolchi xarid qilmoqchi. "Vulverxempton" himoyachisi Nelson Semedu bu rolga asosiy da’vogar hisoblanadi. Bu haqda The Sun nashri xabar bermoqda.
28 yoshli Semedu 2020 yilning sentyabr oyidan buyon inglizlar jamoasida o‘ynab kelmoqda, u "Barselona"dan 32 million yevro evaziga ko‘chib o‘tgan. Joriy mavsumda portugaliyalik himoyachi barcha musobaqalarda 12 o‘yinda ikkita golli uzatmani amalga oshirgan.
Eslatib o‘tamiz, 22 yoshli Jeymsning qaytishi dekabr oyining o‘rtalarida kutilmoqda. U tizzasidan olgan jarohatidan forig‘ bo‘lib, Qatardagi jahon chempionatini o‘tkazib yuboradi.
"Chelsi" Angliya Premyer-ligasida 12 turdan so‘ng 21 ochko jamg‘arib, turnir jadvalida oltinchi o‘rinda bormoqda. Keyingi turda Grem Potter jamoasi "Arsenal" bilan o‘ynaydi.
