"Andijon" klubining har bir uchrashuvidan keyin o‘yinning eng yaxshi futbolchisini aniqlash bo‘yicha o‘tkazib kelinayotgan ovoz berish jarayonlari oktyabr oyida ham doimiy ravishda o‘tkazildi. Unga ko‘ra, andijonliklarning o‘tgan oydagi eng yaxshi o‘yinchisi ma’lum bo‘ldi. Bu jamoamiz sardori Ildar Mamatkazin.

Safarda “Xorazm” jamoasi ustidan qozonilgan 1:0 ko‘rinishidagi g‘alabada aynan yagona gol Mamatkazinning hisobiga yozildi. Bundan tashqari, Andijonda “Turon”ga qarshi kechgan bahsda ham Ildar raqib darvozasini ishg‘ol qildi. Himoyadagi ishonchli o‘yinlari bilan barchada yaxshi taassurot qoldirdi.
 
Umuman olganda, ushbu futbolchi ikkinchi marotaba oyning eng yaxshi futbolchisi nomiga sazovor bo‘ldi. Bunga qadar u aprelda ham munosib topilgandi.

Bu safargi ovoz berish jarayonlarida kurash qizg‘in kechdi. Ayniqsa, Ildar Mamakatkazin bilan Shahboz Erkinov boshqalardan ancha ilgarilab ketdilar. Yakunda “Andijon” sardori g‘olib chiqish uchun 3402 ovoz yig‘di. Erkinov bo‘lsa, 2798 ovoz to‘pladi. Kuchli uchlikni chernogoriyalik legioner Bogdan Milich yakunlab berdi. U 839 ovoz oldi.

"Andijon" bosh murabbiyi Viktor Kumikov oktyabr oyining eng yaxshi futbolchisiga atalgan maxsus statuetkani Ildar Mamatkazinga topshirdi.